Кыргыз Республикасынын Министрлер Кабинетине караштуу Бизнести өнүктүрүү жана инвестициялар боюнча кеңешинин курамына жаңы мүчө — Виртуалдык активдер рыногунун катышуучуларынын ассоциациясы (АУРВА) кошулду. Бул чечим санариптик экономиканын маанилүүлүгүн баса белгилеп, өлкөдөгү криптоиндустрияны өнүктүрүү үчүн жаңы мүмкүнчүлүктөрдү ачат.

АУРВА 2024-жылдын 14-октябрында негизделген жана виртуалдык активдер чөйрөсүндө иш алып барган алдыңкы компаниялар менен адистерди бириктирет. Ассоциациянын миссиясы — инновацияларга, билим берүү демилгелерине жана криптовалюталык рыноктун жоопкерчиликтүү өнүгүшүнө өбөлгө түзгөн туруктуу жана ачык экосистеманы калыптандыруу.

АУРВАнын көз карашы — виртуалдык активдер тармагында стандарттарды жана мыкты тажрыйбаларды түзгөн, рынок катышуучуларынын кызыкчылыктарын коргогон жана Кыргыз Республикасын дүйнөлүк криптовалюта коомчулугуна интеграциялоого көмөктөшкөн алдыңкы уюм болуу.

Ассоциациянын негизги иш багыттары:

• рынок катышуучуларын колдоо жана тармактык өз ара аракеттенүүнү өнүктүрүү;
• рыноктун коопсуздугун жана ачыктыгын камсыз кылган нормативдик актыларды иштеп чыгууга жана киргизүүгө көмөктөшүү;
• калктын криптасабаттуулугун жогорулатуу үчүн билим берүү программаларын уюштуруу;
• блокчейн жана санариптик каржы тармагындагы инновацияларды жана технологияларды илгерилетүү.

АУРВАнын төрагасы Темир Казыбай белгиледи:

«Биздин ассоциациянын Бизнести өнүктүрүү жана инвестициялар боюнча кеңешинин курамына кириши — бул тарыхый окуя жана биз үчүн чоң сыймык. Бул чечим виртуалдык активдердин маанилүүлүгүн таанып, биздин уюмга болгон ишенимди көрсөтүп турат.
Бул мүчөлүк бизге тармактын келечегин түзүүгө түздөн-түз катышууга шарт түзөт: мыйзам базасын иштеп чыгуу аркылуу гана эмес, билим берүү демилгелерин жана инновацияларды колдоо аркылуу да. Биз калктын каржылык сабаттуулугун жогорулатуу жана рыноктун туруктуулугун камсыз кылуу үчүн ишенимдүү жана ачык чөйрөнү түзүү үстүндө иштейбиз.
Негизги максатыбыз — Кыргыз Республикасын Борбор Азиядагы виртуалдык активдер чөйрөсүндө лидер кылуу. Биздин Кеңештеги катышуубуз өлкө экономикасын чыңдоого жана инвестиция тартууга өбөлгө болот деп ишенебиз.»