25-ноябрда Каракол шаарында Ысык-Көл облусунун Регионалдык инвестициялык кеңешинин кезектеги жыйыны өткөрүлдү.
Иш-чарага муниципалдык органдардын өкүлдөрү, Каракол шаарынын вице-мэри, туристтик компаниялар, Президенттин Ысык-Көл облусундагы ыйгарым укуктуу өкүлүнүн аппаратынын кызматкерлери жана Мамлекеттик-жеке өнөктөштүк борборунун (МЖӨ) адистери катышты.

Жыйындын күн тартибине эки негизги маселе каралды:

• Инвестициялык долбоорлор үчүн муниципалдык жер участкаларын берүүдө кезигип жаткан көйгөйлөр;
• МЖӨ боюнча муниципалдык кызматкерлердин компетенциясын жогорулатуу, ошондой эле МЖӨ долбоорлорун ишке ашыруу боюнча ыкмалык колдонмо даярдоо.

Талкуу учурунда катышуучулар РИК менен МЖӨ борборунун иши тууралуу маалымдуулукту күчөтүү зарылдыгын баса белгилешти. Ошондой эле шаар жана облус деңгээлинде инвестициялык долбоорлорду коштоп жүрүүдө бирдиктүү ыкманы түзүү маанилүү экени айтылды.

МЖӨ борборунун өкүлдөрү муниципалдык кызматкерлерди МЖӨ механизмдери, талаптары жана жол-жоболору боюнча окутууга даяр экенин ырасташты — долбоорду концепциялаган этаптан тартып, макулдашуу жана практикалык ишке ашыруу баскычтарына чейин.

Жыйындын жыйынтыгында тараптар инвестициялар үчүн шарттарды жакшыртууга жана жергиликтүү кызматкерлердин кесиптик потенциалын жогорулатууга багытталган биргелешкен ишти улантуу боюнча макулдашышты.

Регионалдык инвестициялык кеңештер (РИК) Кыргыз Республикасынын Президентинин облустардагы Ыйгарым укуктуу өкүлчүлүктөрүнүн алдында иш алып барат. РИКтердин катчылыктары Министрлер Кабинетине караштуу Бизнести өнүктүрүү жана инвестициялар боюнча кеңештин Катчылыгы, БУУӨПтүн Кыргыз Республикасындагы өкүлчүлүгү жана Улуттук инвестициялар агенттигинин алдындагы Мамлекеттик-жеке өнөктөштүк борборунун ортосундагы үч тараптуу келишимдин алкагында иш алып барышат.
Кеңештин демилгелерин ишке ашырууда Европа реконструкциялоо жана өнүктүрүү банкы (ЕРӨБ) колдоо көрсөтүп келет.