2025-жылдын 3-майында Чолпон-Ата шаарында, кооз Ысык-Көлдүн жээгинде, Кыргыз Республикасындагы туристтик сезон расмий түрдө ачылды. Ачылыш аземи «Туризм–2030: Борбордук Азия — бирдиктүү туристтик мейкиндик» аттуу эл аралык форумдун алкагында өтүп, аймактагы өлкөлөрдүн, эл аралык уюмдардын жана туристтик бизнестин өкүлдөрүн чогултту.

Форумдун уюштуруучусу — Кыргыз Республикасынын Экономика жана коммерция министрлигине караштуу Туризм департаменти.

Катышуучуларды саламдашуу сөзү менен Кыргыз Республикасынын Министрлер Кабинетинин Төрагасы Адылбек Касымалиев кайрылып, туризм өлкөнүн туруктуу өнүгүүсүндөгү негизги багыттардын бири экенин жана бул тармакты өнүктүрүүдө мамлекеттер аралык стратегиялык өнөктөштүк өзгөчө мааниге ээ экенин белгиледи.

Форумдун маанилүү бөлүктөрүнүн бири катары «Туризмди өнүктүрүүдөгү инвестициялар жана жаңы моделдер» аттуу панелдик сессия өттү. Аны Кыргыз Республикасынын Министрлер Кабинетине караштуу Инвестициялык кеңештин Катчылыгынын жетекчиси Улук Кыдырбаев жүргүздү. Сессияда туристтик тармакка инвестиция тартуу, эл аралык долбоорлор аркылуу туризмди жаңыча өнүктүрүү ыкмалары жана заманбап инфратүзүмдү түзүүдө жеке сектордун ролу кеңири талкууланды.

Өз ойлору жана тажрыйбасы менен улуттук жана чет элдик уюмдардын өкүлдөрү бөлүштү. Алардын катарында:

• «Кыргыз Куршавель» мамлекеттик ишканасынын директору Жаркынбек Максутов, ал улуттук «Үч Чокулуу» долбоорун тааныштырды;
• GIZ уюмунун улук кеңешчиси Денис Красножонов, Ысык-Көл облусундагы пляж жана туристтик аймактарды туруктуу башкаруу тажрыйбасы менен бөлүштү;
• «Асман Эйрлайнс» авиакомпаниясынын коммерциялык директору Нурай Шайдылдаева;
• жана башка туризм жаатындагы адистер жана ишкерлер.

Форумдун ардактуу коногу – Бүткүл дүйнөлүк туристтик уюмдун (UNWTO) Европадагы директору Кордула Вольмутер айым болду. Ал Кыргыз Республикасынын туруктуу туризмди өнүктүрүү жана аймактык кызматташтыкты бекемдөө аракеттерин жогору баалады.

Кыргыз Республикасы жаңы туристтик сезондо туристтерди ачык маанай, бекемделген эл аралык диалог жана жаңы инвестициялык мүмкүнчүлүктөр менен тосуп алууда.