Кыргыз Республикасы менен Монголиянын ортосундагы кызматташтык чыңдалууда. Бул мамлекет башчысы Садыр Жапаровдун жакында Монголияга жасаган расмий иш сапарында Монголиянын Президенти Ухнаагийн Хүрэлсүх менен болгон жолугушуусунда даана көрүндү. Бул сапар эки өлкөнүн ортосундагы мамилелердин жаңы барагын ачып, өлкөлөрдүн мындан аркы кызматташууга даярдыгын баса белгиледи.

2024-жылдын 31-октябрында Кыргыз Республикасынын Министрлер кабинетине караштуу Инвестициялык кеңештин катчылыгынын кеңсесинде экономикалык байланыштарды жана технология тармагындагы кызматташтыкты кеңейтүүгө арналган жолугушуу болуп өттү. Бул иш-чарага Катчылыктын жетекчиси Улук Кыдырбаев баш болуп бардык кызматкерлер, ошондой эле Кыргыз Республикасындагы Монголиянын толук ыйгарым укуктуу элчиси Ганхуяг Содном жана Argun LLC компаниясынын өкүлдөрү Dawadorj S. жана Batzorig N. катышты.

Argun компаниясы Монголияда кошумча (AR) жана аралаш чындык (MR) чөйрөсүндөгү чечимдерди иштеп чыгуучу алдыңкы компания катары Кыргыз Республикасында өкүлчүлүк ачууга кызыкдар экенин билдирди. Жолугушууда компаниянын негизги иш багыттары, анын ичинде AR технологияларын колдонуу менен билим берүү чечимдерин өнүктүрүү, мектепке чейинки жана мектептик мекемелер үчүн контент түзүү, ошондой эле билим берүү сапатын жогорулатуу үчүн инновациялык продукттарды иштеп чыгуу тууралуу маалымат берилди. Argun, АКШда, Сингапурда, Жуңгодо (Кытайда) жана Европада кеңселери бар компания катары, жергиликтүү демилгелерди өнүктүрүү жана Кыргыз Республикасындагы билим берүү жана технологиялык долбоорлорду колдоо үчүн өз тажрыйбасын пайдаланууга багытталган.

Улук Кыдырбаев технологияларды өнүктүрүү жана билим берүү секторуна инновацияларды киргизүү өлкөнүн экономикасынын туруктуу өсүшүнүн маанилүү бөлүгү экенин белгиледи. Жолугушуунун алкагында Argun компаниясынын технология жана билим берүү тармагында иш алып барган тиешелүү мамлекеттик органдар жана жергиликтүү ассоциациялар менен жолугушуусун уюштурууда Секретариат тарабынан жардам көрсөтүү макулдашылды. Бул өз ара аракеттешүү өнөктөштүк байланыштарды чыңдоого жана Кыргыз Республикасында инновациялык чечимдерди киргизүүнү тездетүүгө өбөлгө түзөт.

Инвестициялык кеңештин катчылыгы инвестициялык климатты жакшыртууга жана Кыргыз Республикасында перспективдүү долбоорлорду өнүктүрүүгө жана кызматташууга кызыкдар эл аралык компанияларды колдоого активдүү көмөк көрсөтүүнү улантууда.